بوپ دأدی جیِب سی بنیاد تے دأل جیبا می تعلیم سی منصوبا
أ بات مھیرے حقیقت چھی یرأ خلگ تُنُو جیِب سی ذریعہ دے دأل جیِبا می ہُم تعلیم غورا کودی۔ تُنُو جیِب می ٹوپ تھأدے چیر جیِبا می تعلیم گے mother tongue based multilingual education بندی۔ ایندے لُوڑ شیرتے آں مزا مزا دے تعلیم می مُوٹھائے بیدی۔
تعلیم سی ہال منصوبا دے جیِب ہُم ترقی کوئی آں لُوڑ ہُم غورا تعلیم کوبھادی۔
ادارہ برائے تعلیم و ترقی (ا ب ت ) اوّل گونا 2008ء می توروالی لُوڑا سی کی تھیِن جیِب می تعلیم شروع کی۔ ادارہ لُوڑا سی کیا توروالی کورس سی کتاب سیوأد آں بھی “مُھن سکول “ سی نام دے بحرین می سکول شروع کی۔ مھیرے ہأ سکولا سی نام “علم سکول “ تھی۔
علم سکولا می لُوڑ اوّل اے کال تُنُو جیِب می ٹول کتاب بندی۔ ہامُوڑ ہے توروالی سی لیِگُو او پڑھاؤ کؤ چھیِڙدی۔ دُوئم کالُو لُوڑا سی کیا اردو او انگریزی ہُم شامل ہودی۔ اے طریقہ دے لُوڑ دُو کالا می توروالی، اردو آں انگریزی اوّل سی تعلیم شروع کودی۔
مھیدیک خانا پرکے ادارہ برائے تعلیم و ترقی ڜو علم سکول تھی۔ ہأ سکولا می لُوڑا ئے فری سبق بندی۔ لُوڑا ئے کتاب ہُم فری دیدی۔
ایڜوکالا پرکے علم سکولے ما چؤ سو ئے ما ذیاد لُوڑے فائیدہ گھیِن تُو۔
